講兩句《媽媽的神奇小子》（微劇透）
-
尋日公映，
開畫日中午票房已經超過100萬。
-
乘住奧運之後、暑假同消費券效應，再加埋人畜無害嘅勵志題材、滿滿嘅正能量同埋頗強勁嘅宣傳，收得係預期中事，1000萬應該無咩難度，我估計2000萬都有機會。
-
套戲係一碗足料嘅雞湯，用料靚，而且適時進補，應該可以滿足大部分觀眾入場前嘅期望。電影演員嘅表現尤其出色，少年同成年蘇樺偉嘅演出真係好好，舉手投足都難以想像佢哋只係演員 ，兩個演員飾演同一個角色，但可以喺講說話方式、動作同神態上做到咁同步，唔係幸運，而係刻苦練習嘅成果，亦係《神奇小子》最大最大值得一睇嘅地方。
-
而電影亦敢於對政府批判，帶出獎牌背後原來運動員嘅生計受唔到保障，做速遞嘅人工原來好過做殘奧金牌，「同工同酬」嘅吶喊應該延伸香港市民對運動員待遇嘅關注，亦係喺而家言論自由不斷收緊之下，相比「安全」嘅「意見」，可以作為觀眾情感投射之一。
-
讚咗好多，但其實我睇完《神奇小子》，係明確地自己唔鍾意。好似上面所講，電影係一碗雞湯，有營養，overall嚟講亦好味，但對我嚟講就係太濃，太多味精。最值得鬧嘅，就係配樂，電影入面適當嘅音樂點綴當然可以畫龍點睛，但電影大部分嘅時候都係一輪接一輪節奏強勁或者煽情嘅配樂，電影有幾幕戲拍得幾好，但礙於配樂，真係專心唔到，可惜。
-
除咗配樂，可能又係礙於target嘅觀眾群，對電影唔夠自信嘅關係，一啲寫得好嘅情節或者對白，因為三番四次重覆，都會令觀眾由欣賞變得煩厭。其中「望阿媽」食‘‘on your mark’’嘅呢一句，食字食得極好，蘇樺偉弱於起步，唯有媽媽先係佢係迷途中嘅舵，無論係練習定係去到奧運，跑嘅目標都係為媽媽，將名利榮辱拋諸腦後，令人感動。但就係電影之後三番四次重覆呢句金句，亦無層次上嘅昇華，令優點變成缺點。
-
總括嚟講，雖然我唔鍾意（事實上，好多我鍾意嘅戲反而大家會狂鬧），但唔代表套戲一無是處。平心而論《媽媽的神奇小子》仍然係一套有唔少明顯優點嘅作品，票房評價應該都會唔錯，如果最後真係收得，對下半年嘅香港電影算係一枝強心針。
Search